3burar.com

Jæja þá er stórfjölskyldan orðin ein í fyrsta skipti !  Amma Brynja og Afi Jómbi voru að fara, hér sit ég ein heima með gríslingana sem eru sofandi upp í rúmi og vonandi vakna þau ekki fyrr en Biggi kemur heim aftur :)  Annars eru þau svo voðalega góð.

Eivor hringdi í mig áðan og kemur til Oslo á föstudagskvöldið, þá mun kella kíkja í fjöruga heimilið og gista.  Spurning um að hún byrji á að láta mjalta sig upp áður en hún kemur, það væri ekki slæmt að hafa eitt sett af búbbum í viðbót !   Það verður hrikalega gaman að sjá hana :) 

Við Biggi erum búin að vera í 3 daga að semda fyrirspurnir, farandi hingað og þangað til að byðja um aðstoð.  Það verður fróðlegt að sjá hvernig næstu dagar verða hjá okkur þar sem við verðum ekki með hjálp og hvernig við tæklum þetta…held að það sé málið að skriðtækla. 

En það sem við erum búin að fá í gegn er ýmislegt

• Fríar bleiur til tveggja ára
• Mat þegar þau fara að borða fasta fæðu
• pela, snuð og einhver leikföng
• Aðstoð í 1 mánuð á daginn

En það sem við erum að reyna að fá í gegn er…

• Fá aðstoð á næturnar við næturgjafirnar
• Fá aðstoð á daginn í meira en mánuð helst í 1 ár

Að fá þetta í gegn er þvílík vinna, það er búið að senda okkur út og suður.  Tala við þennan, tala við hinn og allir benda á einhvern annann.  Svo þegar maður hittir á rétta fólkið þá erum við spurð hvort að við séum búin að spá í aupair eða að finna einhvern sjálf.  En við erum ekki tilbúin að gefast upp strax, þetta á eftir að hafast hjá okkur

Annars setti ég myndir af krökkunum inn í þetta albúm um daginn þegar að þau voru 1 mánaða, fyrir þá sem að voru ekki búnir að sjá þær.

Jæja þá eru gríslingarnir orðnir 1 mánaða, í tilefni af því voru þau klædd í alltof stór föt sem að ég ætlaði að láta þau fara í heim af spítalanum.  Keypti þau þegar þau voru enn í mallanum, gerði mér greinilega ekki grein fyrir því hversu lítil þau væru

Spurning um að gera smá lista af því sem þau geta gert við hvert mánaðar afmæli.  Hér kemur sá listi fyrir þau núna.  Þau geta…..

• Kúkað (og vel af því)
• Pissað
• Prumpað (duglega)
• Ropað (eins og sjóarar)
• Grátið þegar verið er að skipta á þeim og klæða þau í föt
• grett sig í framan og ullað
• Karítas Ísold er búin að læra að gúlpa stundum mjólkinni
• Hlini Snær getur sofið með kúkableiu á sér
• Birkir Smári getur vakað mest
• Svo geta þau öll sprikklað

Jamm það er aldeilis mikið sem þau geta gert.

Svo er það handboltinn á eftir, verð að viðurkenna það að það er ekki alveg sama stemminginn að sitja með poppskál og hlusta á Rás 2 lýsingu af leiknum og að glápa á hann í sjónvarpinu.  En þetta verður að duga þar sem að við erum ekki með RiksTV, ef við værum með það þá gætum við glápt á leikinn!

Jæja krakkarnir halda áfram að bæta á sig.  Við fórum með þau í vigtun í gær og þau hafa greinilega ekki slegið slöku við í matnum.  Á einni viku er Hlini Snær búinn að bæta á sig 450gr, Birkir Smári 385gr og Karítas Ísold 350gr.  Þannig að Hlini Snær er búinn að ná systur sinni og er orðinn þyngri en hún, mér sýnist hann vera óður í að ná bróður sínum sem fyrst.  En þar sem að þau leggja svona vel á sig þá þurfum við ekki að vekja þau á næturna til að borða, en þau eru svo gráðug að þau vakna bara sjálf á 3-4 tíma fresti, heppin við

Ég ætla að skella inn myndum af skírninni og svo fer að vera spurning um að læsa myndasíðunni, ég set nú samt tilkynningu um læsinguna á bloggið hjá mér þannig að þeir sem vilja skoða myndir verða að senda tölvupóst á mig og fá uppgefið lykilorð á myndasíðuna.  En ég læsi henni ekki strax þannig að endilega farið ekki að dúndra á mig pósti strax ;) 

Við erum komin með ótrúlega skrítnar svefnvenjur sofum frameftir öllu og vökum fram á nótt.  Brynja og Jómbi eru með næturvaktirnar þannig að ég og Biggi fáum að hvíla okkur í einni gjöf.  Þau eru síðan að fara á miðvikudaginn og þá erum ég og Biggi með allar gjafir……Það verður hressandi tími !!!!

Jæja gott fólk, þá er Arna prestur búin að döbe blessuð börnin.  Athöfnin tók á 3 ja tíma vegna fjölda barna.  Ákaflega falleg athöfn hjá Örnu, sem sjálf á von á sér í lok febrúar.

Margir urðu/verða vafalítið fyrir vonbrigðum með nöfnin.  Margar tillögur komu; litli jón, jörgen, einar, guðmundur, gunn soffía, kristinn, níní svo fá séu nefnd.  Nöfnin sem hins vegar urðu fyrir valinu;

þríburi 1; Hlini Snær Birgisson

þríburi 2; Birkir Smári Birgisson

þríburi 3; Karítas Ísold Birgisdóttir

Í skírnarveisluna náðu við að safna 17 manns með foreldrum meðtöldum, og því vel messufært og sögur herma að sálmasöngurinn hafi heyrst alla leið niður í Sandvíka.  Í þessari skírnarveislu var einnig Grinibraten kórinn stofnaður, með 3 tenórum, 2 bössum, 5 sópran og nokkrum dívum.  Fyrst æfing verður í góu mánuði og er stefnt á heimsreisu fljótlega á ári apans.  Byrjað er að safna dósum upp í ferðina.

Biðjum kærlega að heilsa öllum

Ása, Birgir, Birkir, Hlini og Karítas

Í gær fórum við með 3burana í fyrstu vigtun eftir að við komum með þá heim.  Krakkarnir eru svo sannarlega að leggja á sig á viku hafa þau öll þyngst um 250 gr, þannig að nú eru þau komin upp í 2300 gr - 2500 gr.  Sá minnsti (stóri bróðir) vinnur verulega á og verður að öllum líkindum orðin þyngstur þegar fram líða stundir ef hann heldur svona áfram. 

Við erum búin að finna trix til að halda partýljónunum í skefjum á nóttunni, einfalt mál við tökum þá bara upp í rúm og þá líður þeim svo vel að þeir hætta að láta órólega og sofna bara.  Þannig að síðustu 2 nætur hafa allir sofið á milli gjafa, ég og mamma með litla prinsa í rúminu okkar

Annars kemur presturinn í heimsókn til okkkar á morgun og fer yfir athöfnina með okkur og fær uppgefið skírnarvotta o.s.frv.  Ég hugsa að nánast allir sem mæta í skírnina verði vottar eða svona allt að því.  Þannig að það styttist í að við gefum upp nöfnin, enda margir orðnir spenntir og margir búnir að panta nöfn. 

Í dag keyptum við svo bókaskápinn, þannig að nú þurfum við bara að bíða í 6 vikur eftir honum.  Enn vantar okkur svefnsófa inn í gestaherbergi nr. 2 og mér sýnist að við þurfum að bíða álíka lengi eftir honum. 

Svo setjum við sennilega næst inn myndir eftir skírnina, jæja ég er farin að gera eitthvað af viti.

Já lífið er ansi skrítið þessa dagana.  Ég geri ekkert annað en að skipta á kúka og pissubleium, gefa að borða og knúsa skinnin mín.  Ég fer ekki einu sinni út í búð þannig að ég hef voðalega lítið að segja annað en að ræða hægðir, sem að flestum finnst bara ekkert gaman að lesa um

Annars var næturvaktin uppgefin eftir nóttina, þegar ég vaknaði klukkan 06:00 þá lá Biggi með skvísuna á bumbunni upp í rúmi og mamma lá frami með 3bura 2 á bumbunni og 3buri 1 var að vakna upp í rúmi.  Held bara að mamma komi heim úrvinda, hér er ekkert sofið á næturna þar sem að krakkarnir eru eitthvað óróleg og róast ekki fyrr en maður heldur á þeim.  Ekki að það sé neitt slæmt en þessi órói mætti samt eiginlega frekar vera t.d. yfir miðjan daginn eða eitthvað annað en á næturna. 

Svo er það í fréttum að rafmagnið í húsinu er allt eitthvað í tómu rugli, Steinar sem að seldi okkur húsið er að fara að koma hingað í dag til að líta á þetta með rafvirkja.  Við ætlum að fara fram á að hann láti laga þetta á sinn kostnað þar sem að rafmagnið er ólöglegt, vírar liggja bara á einangruninni upp á lofti án þess að vera í rörum og svona er þetta líka í veggjunum!  Það er náttúrulega bara brálað, pabbi og Gummi bróðir eru alveg vitlausir yfir þessu.

Svo er náttúrulega skírn á sunnudaginn 13.jan kl. 13:00 fyrir þá sem vilja koma :)  Allir eru allavegana velkomnir!

Jæja nú kingir hann aldeilis niður, hér er búið að snjóa stanslaust frá því í gær og það er bara fullt af snjó.  Biggi prófaði risa snjóskófluna í gær og tókst honum bara vel upp, hann vara bara eins og dráttavél með skúffu þetta gékk svo vel hjá kalli.  En ég held að hann þurfi að fara að prófa hana aftur, innkeyrslan hjá okkur er alveg full af snjó.

Krakkarnir eru með einhvern pirring síðustu gjöf fyrir nóttina og eru búin að vera með þann pirring í nokkra daga þannig að hér sofa meira og minna allir til hádegis.  Ég komst ekki í rúmið fyrr en klukkan 04:00 og þurfti svo að vakna aftur í gjöf klukkan 09:00.  En svo lagði ég mig aftur með skvísuna á mallanum, það er svo gott að kúra þessi skinn :)  Annars er ég með risa frunsu þannig að ég má ekki kyssa þau

Jörgen, Inga, Einar og Birgit fara síðan í dag og á morgun, þannig að nú eru jólin bara búin og allir eru að fara.  Annars erum við búin að hafa það ferlega fínt um jólin, þetta eru bara búin að vera dálítið öðruvísi jól.

Brynja og Jómbi koma síðan á föstudaginn, ættli það sé ekki kominn smá spenningur á þeim bæ

Jæja ég ætla að fara að vekja BiggaMon, því næsta gjöf er að byrja.

Jæja þá er ég loks búin að setja inn nokkrar myndir í viðbót af krökkunum, þá ættu allir að geta séð almennilega framan í guttana.  Myndirnar eru á sömu slóð eða hér.

Annars er það helst í fréttum að litla skvísan hans Bigga kúkaði á hann, þar með tók hún trompið af bræðrum sínum sem voru búnir að pissa á pabba sinn og mömmu sína.  Annars eru þau voðalega ljúf og góð!

Á morgun kemur svo ljósmóðir frá heilsugæslunni í heimsókn til okkar og kíkir á krakkana.

Jæja ég ætla aðeins að halla mér fram að næstu gjöf……

Ása Mjólkurbú!

Við fórum með þríburana í skoðun í dag til barnalæknis á spítalanum.  Það er nú dálítið fyrirtæki að fara með allt settið til læknis.  En allavegana til að vera alveg viss um að ég myndi ekki þurfa að hlusta á grát þá gaf ég þeim að borða áður en við fórum og auðvitað virkaði það, þau voru eins og englar. 

Biggi byrjaði á því að keyra okkur upp að spítalanum og svo hjálpaði hann mér að fara með krakkana inn þar sem ég mátti bíða með þau þangað til Biggi væri búin að leggja bílnum og komin aftur.  Maður heldur ekki á þremur börnum einn !   En á meðan ég beið þá var mín fyrsta kynni af þríburafrægð að veruleika.  Þarna sat ég í makindum mínum og beið eftir Bigga og fólk sem labbaði framhjá ýmist starði úr sér augun, benti eða hrópaði “Look triplets!!!”, hrikalega hressandi ameríkanar þar á ferð.  Og svo komu einhverjir að tala við mig og ég þarf náttúrulega að sitja þarna brosandi og svara öllum rugluðu spurningunum frá fólkinu. 

Algengasta spurningin er náttúrulega hvort að þetta séu glasabörn!  Hvern andskotann kemur fólki það við!  Myndi ég einhvern tíman spyrja fólk hvað það hefði verið lengi að búa til barnið sitt eða í hvaða stellingu……..uuuuuu nei.  Og svo þegar ég segi að þetta séu ekki glasabörn þá er næsta spurning eru fjölburar í ættinni ?  Nei ekki heldur, þetta er bara hundaheppni.  Bíð ekki í það þegar við verðum farin á stjá með trillana okkar……össssss þá á manni sennilega eftir að líða eins og maður sé með andlitið útklínt í súkkulaði eða eitthvað þaðan af verra.

En allavegana þau fengu frábæra skoðun, ekkert að þeim og þau stækka og braggast fínt, barnalæknirinn útskrifaði þau frá sér til heilsugæslustöðvarinnar sem að verður héðan í frá með eftirlitið á þeim.

Jæja krakkarnir eru byrjaðir að hrópa á mjólk, ég er farin að gefa.

Þá erum við útskrifuð, útskrifuðumst á gamlársdag og erum komin heim í heiðardalinn.  Fyrsta nóttin var hálf erfið fyrir krakkana, ég mátti skiptast á að hafa þau upp í rúmi hjá mér.  Held að þau hafi bara orðið eitthvað hálf smeik við sprengingarnar, Norðmenn ætla nefnilega að banna eldflaugar og sprengjur á næsta ári, þannig að þeir tóku á því í ár.  Fyrirhyggjan er að drepa þá ! Það er nefnilega svo mikil eldhætta af þessu og þar af leiðandi er rökrétt bara að banna þetta rugl !!!  Mikið hrikalega er gott að vera komin heim, ég var alveg komin með nóg af þessu spítalalífi, enda búin að vera á spítala frá 17.des.

Við útskrifuðumst af vökudeild Ríkisspítalans 27.des og vorum flutt á sængur og kvennadeild Bærumsykehus.  Þar þurftum við ekki að vera lengur en 3 daga því þá vorum við komin með brjóstagjöfina á hreint.  Ég tek tvö á brjóst og Biggi gefur einu mömmumjólk á pela, þannig erum við búin að koma gjöfunum niður í 45 mín - 1 klukkutíma mikill munur.  Áður tók þetta 1 1/2 tíma til 2 og þá var bara pínu hvíld á milli því maður þarf að gefa þeim að borða á 3ja tíma fresti.

Við erum að spá í að skíra 12. eða 13. janúar eftir því hvort að presturinn sé laus og hvort mamma og pabbi geti verið hér þá.  Það gengur ekki að tala um þau sem Þríburi 1,2 og 3 eða A,B og C.  Við erum sem sagt búin að ákveða nöfnin en höfum ákveðið að gefa þau ekki upp fyrr en við skírum þannig að við viljum bara drífa það af.

Svo förum við nú að setja inn myndir, búin að fá kvartanir um að það vanti inn andlitsmyndir af strákunum.