3burar.com

Héðan er allt gott að frétta, hér er sól sól sól og svakalegur hiti.  Krakkarnir eru berir úti á daginn í skugganum enda var 35 stiga hiti í sólinni hér í dag.  Versta vandamál okkar er að hitinn inni í húsinu okkar er 28 gráður, þó að allir gluggar séu opnir og vifta í gangi til að hreyfa við loftinu.  Þannig að þá eru bara allir úti í skugganum og Embla í sundlauginni.  Sumarið byrjar sem sagt vel, þessu er spáð áfram út vikuna :)

Krakkarnir áttu að fara í 5 mánaða skoðun um daginn en það er verkfall hér hjá heilsugæslufólkinu þannig að við og krakkarnir bíðum bara spennt eftir að verkfallið leysist.  Núna erum “við” eða ég að minnka brjóstagjöfina og er byrjuð að gefa þeim mat eða graut og maukað gænmeti.  Þeim finnst það voða fínt en eru lengi að koma matnum ofan í maga og best er að gefa þeim berum, þá er bara hægt að þrífa skarann með þvottapoka.  Stefnan er að hætta alveg með þau á brjósti í sumar þar sem að mamman er orðin talsvert þreytt, enda bara nokkuð vel af sér vikið að vera búin að vera með þau á brjósti allan þennan tíma

Gestirnir okkar eru vel nýttir, Pétur sér um eldamennsku og Ellen um þrif :)  Ekki slæmt að fá slíka gesti, verst að þau geti ekki verið lengur en 14 daga.  Svo er Pabbi að koma hingað í 2 daga 8. júní, hann er að fara eitthvað að vesenast hér í Norge og kemur við hjá okkur á heimleiðinni.

Ása og gengið í sólarfíling

Jæja þá eru krakkarnir farnir að smakka mat, við gáfum þeim mat í fyrsta skipti um helgina.  Það má segja að Hlina Snæ hafi líkað það bara ágætlega ásamt systkinum sínum.

Ég skellti inn nýju albúmi með þessum tímamótum auk mynda af okkur á pallinum í góða veðrinu að undirbúa komu gesta í sumar

Pétur frændi og Ellen ríða á vaðið með sumarheimsóknum til okkar og koma á morgun með stórfjölskylduna sína (Emblu Rún og Unu Dögg).

Sólarkveðjur Ása, Biggi og tríóið

Þá erum við komin heim.  Ferðin var alveg frábær í alla staði, ótrúlega gaman að fara að hitta vini sína.  Síðustu dagarnir í Lundi voru vel nýttir í svefn og verslunarleiðangra.  Við keyptum okkur tvíburakerru og svo eina staka kerru til að geta farið með krakkana inn í verslanir, þar sem að þríburakerran er svo breið og ónothæf í slíkt nema maður sé að fara í “window shopping”.   

Við viljum bara þakka fyrir okkur í Flensburg hjá Eivor og Alla og svo í Lundi hjá Guðbjörgu og Tedda, við fengum frábærar móttökur.  Spurning að við sendum bara þríburana eina næst

En ég skellti inn myndum frá ferðalagi okkar á myndasíðuna og hér eru þær 

Ég mun síðan setja inn myndir frá Apríl inn á morgun eða hinn ;)  segi allavegana frá því á blogginu þegar ég er búin að því

Þá erum við að fara að keyra aftur til baka til Lundar á morgun.  Ferðin niður til Lundar tókst bara vel, krakkarnir una sér vel í bílnum.  Veit ekki alveg til hvers við keyptum bíl sem var með DVD kerfi.  Þeim finnast bílhljóðin bara fín og útsýnið út um gluggana bara ágætt, spurning hvað það gengur lengi í þau, en við eigum þá DVD dótið þegar trén fara að verða leiðinleg :) 

Hér kemur smá samantekt á því sem við erum búin að gera

Lundur (Svíþjóð)   

Við mættum á svæðið á föstudaginn var og að sjálfsögðu var konunglega tekið á móti okkur, grillveislur og tilheyrandi.  Svo fórum við í þríbura afmæli hjá Kidda og Níní, fróðlegt að syngja afmælissönginn en fínt að sjá hvernig á að gera þetta áður en að afmæli hjá okkur bera að garði.  Annars kom Lundurinn bara nokkuð á óvart, krakkarnir(Kiddi, Níní, Teddi, Guðbjörg, Davíð og Ásta) hafa það bara flott þarna og una sér vel.  Það var reynt að fá okkur yfir en við látum ekki bugast og höldum okkur við Noreg.  Við röltum um í bænum og fórum meðal annars í barnabúð sem var í kjallara og til að komast þangað máttum við taka barnavagninn í sundur að hluta til, annars hefðum við ekki komist inn í lyftuna, það lá við að ég pissaði í mig af hlátri við að reyna að troða vanginum inn í lyftuna.  Annars fékk Hlini Snær 38,5 stiga hita síðasta daginn sinn, en hann var ekki með neinn hor eða hósta, sennilega bara tennur eða eitthvað.  Birkir Smári fékk síðan hita daginn eftir í Flensburg og svo ekki söguna meir.

Flensburg (Þýskaland)

Við keyrðum yfir til Flensburgar á Fimmtudaginn var til að heimsækja Alex og Eivor.  Lúkas er búinn að vera á fullu að hjálpa til með þríburana, setja snuð upp í þau, athuga með táfýlur og skoða í beiurnar.  Í gær fórum við svo á síðasta leikinn í deildinni og horfðum á Flensburg - Minden við gífurleg læti í höllinni, á meðan á þessu stóð sváfu krakkarnir í vagninum inni í höllinni.  Þegar leikurinn var búinn tók svo við asnalegasta upplifun æfi minnar, fyrir utan höllina var náttúrulega gífurlega mikið af fólki þar sem að einhver skemmtun átti að vera á sviði þar fyrir utan.  Allavegana við trilluðum þarna með vagninn og þegar við mættum opnaðist bara svona gjá í mannþröngina og allir byrjuðu að glápa, benda, ópa og gala eitthvað á þýsku og ég er kann ekki eitt orð í þýsku.  Þetta var orðið svo vandræðalegt að ég fór frá Bigga og lét hann bara keyra vagninn, bigga til mikillar ánægju.  Þjóðverjar eru náttúrulega svolítið spes….eigandi börn á fimmtugsaldri og sennilega sitt eina barn, þannig að þríburarnir mínir voru eins og sirkusdýr…..ekki spennandi!  Svo fórum við á fótbotlaleik í dag þar sem handboltaliðið var að keppa í fótbolta á móti liði hér í Flens, ferlega gaman.  Alex er orðinn meistari að svæfa krakkana, maður bara leggur þau í hendurnar á honum og þau eru sofnuð á engum tíma, spurning hvað þessi þríburaheimsókn mín eigi eftir að setja mikla pressu á Eivor.  Á morgun er síðan förinni aftur heitið til Lundar þar sem við ætlum að stoppa í 1 - 2 nætur áður en við förum aftur heim til Noregs. 

En eftir þetta þá er bara ekkert mál að ferðast með þríburana, það verður bara einfaldara…..krakkarnir fara bráðum að hætta á brjósti og geta farið að borða mat og þá verður þetta auðveldara…….kannski við leggjum bara í aðra heimsókn einhverntímann í ár.  Þetta er búið að vera alveg ferlega gaman og sérstaklega fyrir mig að fá að hitta vini mína aftur og komast út út húsi

Kveðja ferðalangarnir Ása, Biggi, Hlini Snær, Birkir Smári og Karítas Ísold

Jæja hér er alltaf mikið að gera og lítill tími í að skrifa.  Ég var reyndar búin að skrifa alveg heilmikið um daginn en komst ekki í að birta það og nú virðist það bara hafa gufað upp, finn ekki færsluna, ég var handviss um að hafa save-að hana en svo er ekki. 

En hvað um það, héðan er allt gott að frétta.  Krakkarnir spjara sig vel og eru hress og kát.  Biggi er að fara í feðraorlof á föstudaginn, reyndar ólaunað og ætlar að vera til september en það verður frábær tími.  Þannig að þetta er síðasta vika Evu og er hún hér með tárin í augunum yfir því að vera að hætta hjá okkur.  Við erum svo búin að plana Lundarferð í lok vikunnar, kíkja á landann í Svíþjóð.  Þegar við erum búin að vera þar þá er planið að halda áfram og keyra niður til Flensburgar og kíkja á Eivor og Alla.  Ætli við skellum okkur ekki á síðasta leikinn í deildinni þar

Annars fóru Kristín og Mundi í gær, þeirra er sárt saknað og þá sérstaklega af rafmagnsrúminu okkar það verður ekki farið nánar út í það.  Mundi og Stína voru ekkert smá fínn með krakkana, þeim var klappað og ruggað endalaust.

Hér er komið sumar og sól….hitinn búinn að vera um 20 °C frekar lengi og sólin sleikir pallinn minn. 

Jæja ég skal vera duglegri að skella inn smá texta við og við og svo ætla ég að setja inn myndirnar frá Apríl sennilegast á morgun.

Ég er farin að halla mér, krakkarnir sofnaðir og þá þarf ég að gera það sama