3burar.com

Krakkarnir urðu 6 mánaða í gær, mikið svakalega líður tíminn hratt. Hrikalega stutt síðan þau gerðu ekkert annað en að sofa og drekka.  En í tilefni af deginum þá voru settir upp tripp trapp stólarnir, núna sitja krakkarnir í tripp trapp meðan mamma og pabbi borða morgunmatinn eða bara þegar mamma og pabbi þurfa að kaupa tíma.  Það er hrikalega fyndið að horfa á þau í stólunum.  Karítas Ísold er á fullu að skemmta bræðrum sínum með allskonar hljóðum og brosum og þeir skellihlæja að henni, spurning hvort að samkomulagið verði alltaf svona ??????

Þar sem að það var verkfall hjá hjúkrunarfræðingum þá fóru krakkarnir seint í 5 mánaða sprauturnar sínar og því voru þau ekki viktuð við 5 mánaða aldurinn heldur bara á mánudaginn var og þá var staðan eftirfarandi

• Hlini Snær 7245 gr og 66 cm
• Birkir Smári 7145 gr og 67 cm
• Karítas Ísold 6420 gr og 63 cm

Öll halda þau sinni kúrfu og var Siri Hjúkrunarfræðingur ferlega sátt með þau, Strákarnir eru komnir inn í kúrfu fyrir jafnaldra þ.e. 6 mánaða en Karítas Ísold sleikir neðstu línuna af kúrfunni. Það er greinilegt að  Karítas Ísold ætlar að fara rólega í þetta, hún er bara að einbeita sér að öðru, eins og t.d. að vera ekki kjur á leikteppinu sínu :)

Enginn tönn er farin að kræla á sér og er mamman bara ánægð með það, þar sem þau eru enn á brjósti

Annars styttist í næstu heimsókn, Agnes systir, Einar og Laufey Ása eru að koma og verða í 3 vikur…..spennandi tímar framundan og allta að gerast

Jæja við erum farin að horfa á leikinn…….áfram Holland!

Skellti inn nýjum myndum, hef ætlað að gera það í nokkra daga en hef verið ansi upptekin.  Krakkarnir fóru í sprautur á mánudaginn þannig að þau fengu smá hita og voru dálítið lítil í sér.  Allavegana blogga um það á morgun er að fara í háttin núna enda klukkan alltof margt hjá mér.  Myndirnar eru sem sagt komnar inn í júní albúmið.

Kveðja

Grinibråten gengið

Pétur, Ellen, Embla og Una eru farin heim til Íslands.  Held að þau geti bara ekki kvartað yfir veðrinu, hér var betra veður en á Spáni og var endað á að kaupa busllaug handa Emblu litlu þannig að hún gæti verið úti í hitanum.  Una var ekkert svakalega sátt til að byrja með en ég held að hún hafi bara kunnað vel við sig alsber úti undir sólhlífinni :)  Þar sem að veðrið var svona gott var lítið gert annað en að njóta veðursins á pallinum.  Við fórum reyndar eftirminnilega ferð upp í bústað til Gumma bróður og Åse sem að endaði þannig að við vorum bara í fangelsi inni, flugurnar voru svo ágengar að maður átti í fullu við að verjast þeim inni.  Gríslingarnir fóru því ekkert út í vagn og voru bara inni þar sem ég var í því að drepa flugur í kringum þau.  En það var ekkert smá gaman að fá Pésa frænda og Ellen, hlakka bara til að fá þau aftur.  Spurning hvenær það verður þar sem að Embla var ekki alveg á einu máli hvenær hún ætlaði að koma aftur.

Sniglar herja á garðinn hjá okkur og það engvir smá sniglar…..spænsku andskotarnir!  Biggi og Pétur stóðu í ströngu við að fanga þá, held að það séu einir 200 komnir og það er bara rétt byrjunin.

Annars var Hlini Snær stunginn í andlitið af vespu í gær,  gengið var sofandi úti í vagni og ég heyri þetta líka svakalega öskur og hleyp út og þar hefur vespa komist undir netið á vagninum og situr á kinninni á Hlina Snæ.  Ég og flugur eru nú ekki vinkonur en ég varð nú að rífa helv### af Hlina Snæ.  Aumingja litla skinnið bólgnaði upp og var smá aumur í gær, núna sést ekki mikið á honum bara rauður díll þar sem að hún stakk hann.

Verkfall hjúkrunarfræðinga er búið og loksins eru krakkarnir að fara í 5mánaða skoðun og sprautur, það er samt ekki langt þar til þau verða 6 mánaða.  Við förum á mánudaginn og þá kemur í ljós hvað þau eru orðin þung og löng.

Svo fer ég að skella inn myndum sem við höfum tekið í júní, spurning að gera það bara um helgina.

Kveðja Grinibråten gengið