3burar.com

Þá er önnur veikindahrina byrjuð.  Hlini Snær liggur núna með 40°C og búin að vera þannig síðan í gærkvöldi og svo tók Birkir Smári upp á því að æla yfir allt rúmið sitt og nú liggur hann með pabba sínum upp í okkar rúmi og er líka búinn að æla yfir það allt. 

Ég er alveg á nálum því þeir sem þekkja mig vel vita hversu hrædd ég er við ælupestir, það er bara ekkert eðlilegt.  Ef ælupest gengur á einhverju heimili þá fer ég ekki þangað í viku.  Núna bara vona ég að Birkir Smári nái ekki að smita systkini sín af þessum óþverra eða okkur foreldrana.

En hvað um það, síðasti tíminn í sundinu var í gær og fannst krökkunum að sjálfsögðu svakalega gaman og því erum við búin að skrá okkur á framhaldsnámskeið sem að byrjar í janúar.  Jörgen, Inga og Gunn-Sofia eru búin að vera svo dugleg að hjálpa okkur í sundinu og eiga þau mikið hrós fyrir.  Takk fyrir að nenna þessu með okkur

Jæja ég ætla að einbeita mér að jólakortaskrifum, ætli ég hafi ekki klukkutíma núna nema að eitthvað komi upp á! 

Já já þá erum við byrjuð að skreyta svona eins og flestir Íslendingar gera, alltaf svo flott að sjá jólaljósin í skammdeginu. Alveg yndislegt að horfa út um gluggan og horfa á öll jólaljósin, þar sem að útsýni frá mér er nokkuð mikið þá ætti ég að sjá ótrúlega mikið af fallegum jólaljósum sem lýsa upp skammdegið.  En nei nei Norðmenn eru gjörsamlega steingeldir þegar kemur að jólaljósum og skrauti.  Þegar ég horfi út um gluggan minn, einu ljósin sem ég sé eru ljósin mín og svo er nágranna konan búin að setja aðventuljós í gluggan og eitt annað hús í fjarska er komið með seríur á húsið.  Þetta er allt og sumt!  Svo sé ég 2 jólatré sem bærinn eða einhver fyrirtæki hafa sett seríur á.  

Ég veit ekki hvað veldur þessum ótrúlega “geldleika” norsku þjóðarinnar.  Allir litir eru á bann lista, hér eru bara hvítar eða glærar perur.  Ef maður sér liti einhversstaðar þá veit maður að það býr útlendingur þar.  Kannski þorir bara enginn að taka af skarið og setja upp fallegar ljósaseríur, þá fara nefnilega nágranarnir að tala um að húsið þitt sé eins og tívolí!  Ef til vill er það nískan sem er að drepa þá!  En hvað um það þá erum við eyðsluseggirnir hér búnir að setja upp tívolí “sjóv” handa nágrönnunum okkar, og svo verður fólk bara að hafa eitthvað til að tala um við aðra.

Hér er búið að snjóa meira og minna í allan dag og þegar við vöknuðum í morgun var ótrúlega flott að horfa út um gluggan.  Öll trén voru þakin snjó og svo náttúrulega logn, en ekki hvað!  Jólakortamyndin var bara út um gluggan minn! 

Ég og Biggi vorum svo hagsýn að við erum bara nánast búin að kaupa allar jólagjafir í ár, ekki nema örfáar eftir.  Ég er farin að hlakka svo svakalega til jólanna að það er ekkert eðlilegt.  Tími jólanna er yndislegur tími, góður matur, smákökur, mandarínur, laufabrauð, kertaljós, bækur og spil.

Jæja Biggi var að panta vöfflur og heitt súkkulaði, þannig að ég er farin í eldhúsið eins og góðri húsmóður sæmir.