3burar.com

Jæja héðan úr vetrarríkinu er ekkert annað að frétta en snjór og meiri snjór. Þegar ég vaknaði í morgun beið mín heil innkeyrsla sem var með 40 cm jafnföllnum snjó, þetta þarf náttúrulega að moka! Kallinn í vinnunni og ég heima með börnin, ekkert annað að gera en að taka krakkana út í snjóinn og moka, og vel af því.
Ég bakaði lummur í fyrsta skipti í gær úr hrísgrjónagraut, tókst bara svona líka vel og krakkarnir að sjálfsögðu brjálaðir í lummurnar.

Annars er það helst í fréttum að við erum að vinna í að gera umsókn fyrir krakkana á leikskóla, umsóknarfrestur fyrir veturinn 2009-2010 rennur út 1.feb. Þannig að þetta þarf að vera klárt fyrir þann tíma. Ef þau fá neitun þá veit ég hreinlega ekki hvað við gerum af okkur. Það er líklegast ekki séns að sama dagmamman sé með 3 laus pláss og ekki fer ég að deila þeim út um hvippinn og hvappinn. Krossleggjum fingur í þetta sinn að við fáum inn.

Hér er svo mynd af krökkunum frá því í dag í snjónum

Hér kemur myndbandið af henni, hún var líka með í leiknum. Þegar mamman fattaði að taka þetta upp á video var kellan orðin svo óþolinmóð og pirruð á þessum hægagangi að ekki tókst betur til en svona. En ætli þetta lýsi ekki bara best karakter hennar, segir hin ótrúlega þolinmóða mamma

Á þessum bæ er líf og fjör, krakkarnir eru sprækir eins og vanalega og alltaf mikið að gera á stóru heimili. Gísli Bergmann kom í mat til okkar í gær þar sem hann er nýfluttur til noregs. Fínasta kvöldstund.
Við vorum að byrja á því að láta krakkana sofa bara einn blund á dag í staðin fyrir 2 og eru seinnipartarnir og kvöldin dálítið erfið fyrir þessi skinn. En þau verða fljót að jafna sig á því eins og öðru, annað eins hafa þau gengið í gegnum.
En svona til að gleðja ykkur á nýju ári þá smellti ég inn tveimur myndböndum af krökkunum í staðin fyrir myndum, þannig að þið getið séð þau aðeins meira “live”

Já gleðilegt árið og takk fyrir okkur

Desember var nokkuð erfiður, krakkarnir fengu hverja pestina á fætur annarri, kvef, hiti eftir sprautur, ælupest, hálsbolga og niðurgangur.  Þannig að jólaundirbúningur var nokkuð erfiður og gerður helst á kvöldin þegar krakkarnir voru farnir að sofa, en þrátt fyrir það þá komu jól.  En á undan þeim var náttúrulega 1.árs afmæli.

Alveg ótrúlegt hvað tíminn líður hratt.  Ég er bara ánægð með að hafa komist í gegnum þetta ár án þess að missa heilsuna,  enda komu tímabil sem voru alveg hrikalega erfið.  Ég ætla ekkert að fara í felur með það, þetta er sennilega það erfiðasta sem ég hef gert en jafnframt það ánægulegasta, spurning um að taka bara tvíbura næst!  En mikið rosalega hafa þau þroskast á þessu eina ári, stutt síðan þau gátu varla sig hreyft og núna stappa þau niður fótunum og leggjast killiflöt niður á gólfið ef þau fá ekki það sem þau vilja.

Margt var um manninn í afmælinu og var fullt hús af íslendingum.  Við héldum upp á afmælið með pompi og pragt og var húsmóðirin með fullt borð af kræsingum og einni sjóræningjaköku fyrir krakkana.  Okkur langar að þakka kærlega fyrir allar gjafirnar sem krakkarnir fengu

Amma og Afi og Kolli og Anna komu svo 21.des og voru yfir áramótin hjá okkur, hrikalega gaman og ómetanleg hjálp.  Alveg ótrúlega gaman að hafa þau hjá okkur yfir jólin, horft var á dagvaktina, spiluð spil og “tillað” og leikið sér :)  Áramótin voru ólögleg þar að segja við sprengdum upp allnokkuð af rakettum sem eru bannaðar í Noregi.  Svíjarnir leifa allt slíkt þannig að sá varningur var keyptur þar og svo skotið upp ólöglegum flugeldum.  Jón Björn og Kolli voru fremstir í þeim glæp.

Krakkarnir fóru í 1.árs skoðun og sprautur rétt fyrir afmælið sitt og eftirfarandi er mæling þeirra

• Hlini Snær 9.690 grömm, lengd: 75,5 cm og höfuðmál: 47 cm
• Birkir Smári 9.645 grömm, lengd: 76 cm og höfuðmál: 46,9 cm
• Karítas Ísold 8.605 grömm, lengd: 71 cm og höfuðmál: 44,3 cm        

En svo enda ég þennan pistil minn á að segja ykkur að ég skellti inn 2 albúmum.  Frá nóvember og desember þannig að þið getið séð hvað krakkarnir eru orðnir stórir og pattaralegir.

Áramótakveðja

Noregsgengið